Nakuha na ang tanan nga bangkay sang New People’s Army nga napatay sa engkwentro sa banwa sang Cauayan, Negros Occidental, luwas lang sa bangkay ni Vince Francis Dingding, alyas Poy, deputy speaker sang South West Front kag political instructor nga residente sang Don Gil Garcia Extension, Capitol Site Poblacion, Cebu City.
Madumdumann nga nagpadala sang sulat ang ginikanan ni Dingding gikan sa Cebu nga indi na nila pagkuhaon ang bangkay sini sa Negros Occidental.
Sa interview sang Bombo Radyo kay Lt Col. Robert Maduli, Commanding Officer sang 15th Infantry Battalion sang Philippine Army, kahapon sang udto nakuha na ang bangkay ni Alex Chavez Languita alias “Axel” – Member, South West Front-D, KR-N (PSRL), residente sang GK, Barangay Kabulakan, Santa Catalina nga isa man sa napatay sa engkwentro.
Samtang, pahayag ni Maduli, gina-istoryahan pa nila kun idul-ong ba sa pamilya ang bagkay ni Dingding ukon diri nalang ini sa Negros ipalubong. Suno diri, kun mapasugot ang pamilya sini, ang Local Government Unit nalang ang masabat sa tanan nga gasto sa pagpalubong.
Sa pihak nga bahin, ginpahayag ni Maduli nga estable na ang kondisyon sang isa pa ka miyembro sang NPA nga si Joey Elasyo Paguntalan, alyas Johnrey residente sang Sitio Singgarungan, Brgy Camindangan, Sipalay City nga gindala sa ospital matapos maka-agom sang pilas sa tiil kag sa alatrasan aksunod sa natabo nga engkwentro.
