Nakuhaan sang masobra P3.4 million nga balor sang shabu ang residente sang Zamboanga City nga nagapahayag nga ginsugo lamang magdeliver sa Prk 5, Brgy Liptong, Valencia, Negros Oriental alas-8:39 kagab-i.
Ang operasyon ang ginpangunahan sang Provincial Drug Enforcement Unit – Provincial Intelligence Unit sang NOrPPO kaupod ang Valencia Municipal Police Station kag Philippine Drug Enforcement Agency (PDEA).
Sa interview sang Bombo Radyo Bacolod kay Negros Oriental Police Provincial Office Spokesperspon Police Captain Stephen Polinar, ang suspect nga ginkilala nga si Alyas Jeric ang residente sang Zamboanga City.
Pahayag sini nga siya ang ginsugo lamang nga magkadto sa Negros Oriental kag magdeliver sa kilala sang iya amay.
Narecover sa ginakonsiderar High Value Individual (HVI) ang ginabanta 511 grams sang shabu nga may standard drug price nga P3,474,800.
Panindugan niya nga wala siya nakahibalo kun ano ang unod sang iya igadeliver, kag indi man niya kilala ang dul-ungan.
Ginpasaka na nila ang kaso subong nga adlaw may kaangtanan sa Republic Act 9165 ukon Comprehensive Dangerous Drugs Act.
Nagapadayun man ang ila imbestigasyon tuhoy sa background sang subject person.
