Ginpahayag sang Department of Migrant Workers (DMW) nga posible marepatriate na sa masunod nga semana ang bangkay sang tatlo ka mga overseas Filipino workers nga nagkalamatay matapos nasunog ang isa ka residential building sa Mangaf, Kuwait.
Suno kay Migrant Workers chief Hans Cacdac, ang gobyerno sang Pilipinas ang may maayo nga relasyon sa Kuwait kag maayo ang partnership sa bahin sang mga repatriations.
Suno kay Cacdac, may kumpiyansa ini nga sa madasig nga tinion, posible sa masunod nga semana, makapauli na sa Pilipinas ang tatlo.
Una na sini nga ginpahayag nga ang tatlo ka mga fatalities ang nagkalamatay matapos nakahaklo sang aso apang wala naman sini gindisclose ang identity sang mga fatalities.
Sila ang kabahin sang grupo sang 11 ka mga Filipinos sa Kuwait kag lunsay nagatrabaho para sa isa ka construction company.
Suno kay Cacdac, duha ka iban pa nga Filipino ang nagapabilin sa ospital kag yara sa kritikal nga kondisyon.
Sa 11 ka mga OFWs, anom naman ang luwas kag malayo sa katalagman.
