Bangud lang sa tulukay, ginbuno sang tatlo ka mga lalaki ang kaangay nga lalaki nga ila nasugata sa footwalk sa Purok Riverside, Zone 2, Barangay Bata, Bacolod City kahapon sang hapon.
Ang biktima ang ginkilala kay Jeffry Solon, yara sa legal nga edad kag residente sang nasambit nga lugar.
Papauli na kuntani ang biktima sa ila nga puluy-an apang nasugata sini ang tatlo ka mga suspetsado sa footwalk.
Matapos nga magtulukay, gilayon nga nagreklamo ang isa sa suspetsado nga ginkilala kay Resty Cabalida, 28 anyos residente man sa lugar, nga ginsugudan sang komosyon.
Kaupod ni Cabalida sanday Reymund Bedoria, 29 anyos kag Johnrey Daño, 30 anyos, lunsay mga residente sang Hacienda Da-o, Barangay Burgos, Cadiz City.
Ginbuno ni Bedoria si Solon gamit ang kutsilyo kag nag-angkon sang pilas sa natuo nga bahin sang tiyan kag sa liog ang biktima.
Nagdalagan ang tatlo padulong sa bahin sang North Terminal sang Ceres Bus.
Ang amay sang biktima ang nagpangayo sang bulig sa mga katapo sang beat patrol sang Bacolod City Police Station 3 nga malapit sa lugar.
Nagdangat sa bakante nga katubuhan malapit sa North Terminal ang lagsanay nadakpan sang mga kapulisan ang tatlo ka mga suspetsado.
Samtang, wala naman marecover ang kutsilyo nga gingamit sang suspetsado matapos niya ini ginhaboy kasunod sang insidente.
