Magapatigayon sang training ang Emergency Operations Center sang Bacolod City sa mga Barangay Health Workers kag Barangay Health Emergency Response Team sa Marso 1 agud mahatagan ang mga ini sang ihibalo tuhoy sa COVID vaccine kag may yara ang mga ini sang isabat sa mga pumuluyo nga nagapamangkot tuhoy diri.
Sa interview sang Bombo Radyo kay Association of Barangay Council President Lady Gles Gonzales Pallen, ginpahayag sini nga yara lang sa 5 tubtob 10% ang luyag mag-avail sang COVID vaccine sa kada panimalay diri sa ciudad.
Suno kay Pallen, may yara man sang mga interesado kuntani nga magpabakuna apang may mga pamangkot ang mga ini kag indi man makasabat ang mga BHW, BHERTs kag opisyales sang barangay bangud wala sila maayo sang ihibalo.
Gani magapatigayon sang training para sa mga BHW kag BHERTs sa Marso nga pagapangunahan sang mga doktor kag eksperto.
Tinutuyo sini ang mahatagan sang ihibalo ang mga barangay health workers agud mas makaengganyo sa mga pumuluyo nga mag-avail sang bakuna.
Nagpanugyan man si Pallen sa mga Bacolodnon nga indi magpati sa mga fake news kag pamatian ang brighter side sang vaccine bangud wala ini gin-ubra para sa kalainan kundi para sa benepisyo sang tanan.
