Ginkumpirmar sang pinuno sang City Disaster Risk Reduction Management Office sang San Carlos City nga mahimo na nga magamit ang Barangay Quick Response Fund (QRF) agud ibulig sa mga nasunugan.
Madumduman nga sang Biyernes sang gab-i nagluntad ang sunog sa Endrina Street, Barangay 5, San Carlos City.
Sa interview sang Bombo Radyo Bacolod kay Joe Ricalex Alingasa, magluwas sa QRF sang Barangay ang ciudad ang nagahatag man sang bulig kaangay sang pagkaon kag ini ang ginapreparar sang Barangay Health Workers.
Suno kay Alingasa, mameeting pa ang local government unit agud maestoryahan ang assistance nga ihatag sa mga biktima sang sunog.
Samtang ang pila sa mga nasunugan ang nag-amat amat na balik sa ila lugar nagikan sa evacuation center.
Ginpahayag man ni Alingasa nga ang nagwa sa report sang Bureau of Fire sa San Carlos City nga napabay-an nga nasindihan nga sigarilyo ang rason sang sunog samtang ang gin-alegar nga nagbilin sang ginsindihan nga sigarilyo ang nakapadulong naman sa San Carlos City Fire Station agud maathagan ang ila pangalan.
Suno pa diri alegasyon lamang ang ginapahayag nga mahimo nagapatigayon sang drug session ang balay nga ginhaligan sang kalayo nga nagtuga sang sunog apang noted naman nga ang barangay ang drug-infected area.
