Maswerte nga nakaluwas ang jail officer matapos gintiro sang riding-in-tandem sa syudad sang Bacolod sini lang nga hapon.
Sa impormasyon nga nakuha sang Bombo Radyo Bacolod, natabo ang insidente sa atubang sa isa ka hotel nga yara lang sa kilid sa entrance gate sang bredco port.
Suno sa hepe sang Police Station 1 nga si Police Major Jovil Sedel, pagwa ang salakyan sa port sa diin nagasakay ang anay bata sang anay jail warden kag subong isa naman ka Jail Officer 1 sa BJMP- Handuman nga si Javy Jason Vargas.
Gikan sa syudad sang Iloilo ang biktima upod ang iya manghod nga babaye.
Sang yara na sa atubang sang isa ka hotel, hinali na lang sila gin-paarakan sang tiro sang riding-in-tandem.
Apang, maswerte lang bangud sa kamot naigo ang biktima, kag dali-dali naman nga nag-pasiburhot ang utod sini nga babaye padulong sa ospital.
Dugang pa sang hepe, padayon pa nila nga gina-usisa kun ano ang motibo sa natabo nga insidente, apang ginpahayag sini nga dako ang posibilidad nga si Vargas ang target sang mga suspetsado bangud madamo ang igo sang bala sa windshield sa front seat sa diin naga-pungo ang biktima samtang ang manghod naman sini nga babaye ang naga-drive.
Narekober sa crime scene ang 7 ka bala sang 45 calibre.
Sa karun, yara naga-pabilin sa Corazon Locsin Montelibano Memorial Regional Hospital ang biktima agud ipaidalom sa x-ray.
