Personal nga ginkilala sang ila nga himata ang duha sa 19 ka mga rebelde nga napatay sa natabo nga engkwentro sa tunga sang 79th Infantry Battalion sang Philippine Army kag New People’s Army sa Brgy Salamanca, Toboso, Negros Occidental.
Ang mga natumod nga bangkay ang ginlakipan nanday Rowel Sabillo, 19 anyos, residente sang Brgy Tabunac, Toboso kag Rene Villarin Sr., 67 anyos, residente sang Brgy Marcelo, Calatrava, Negros Occidental.
Suno kay Nixon Villarin, bata ni Rene Villarin Sr, ang amay sini nga isa sa mga napatay ang katapo na sang New People’s Army sa sulod sang 30 ka tuig.
Suno kay Nixon, antes pa man ini ginbun-ag sa kalibutan nagaupod na sa makawala nga grupo ang iya amay.
Dugang pa sini nga proud siya sa iya amay nga bisan napatay nga ginpakigbato sini kun ano ang para sa iya husto.
Ang rason kung ngaa nag-upod ang amay sini sa hublag bangud sa kapigaduhon.
