Welcome development para sa Bayan Muna ang papaggwa sang International Criminal Court nga mga pangalan sang co-prepatrators ni Former Presidente Rodrigo Duterte sa madugoon nga war on drugs sa idalom sang iya administrasyon.
Sa interview sang Bombo Radyo Bacolod kay Bayan Muna Executive Vice President Atty Carlos Isagani Zarate, wala na nila ginkakibot nga naggwa ang pangalan nanday Senators Bato dela Rosa kag Bong Go, anay Justice Secretary Vitaliano Aguirre kag iban pa.
Suno diri, ang polisiya sang war on drugs indi lamang si Duterte ang nag-implementa kag may yara gid ini sang kaupdanan.
Pahayag ni Zarate, luyag man niya nga makita nga ma-isyuhan sang warrant of arrest ang mga co-prepatrators agud mapadala man sila sa International Criminal Court para atubangon ang kaso batok sa ila.
Mensahe sini sa mga ginhingadlan nga co-prepatrators nga kun maisog sila sadto mangin kabahin sang war on drugs, indi sila dapat mahadlok nga mag-atubang sa ICC kun nagapati sila nga wala man sila sang sala.
