Ginapakamaayo sang Chairman sa BAYAN MUNA partylist ang rekomendasyon sang Office of the Ombudsman sa pagfile sang graft charges batok kay sa anay mga opisyales sang Procurement Service-Department of Budget and Management (PS-DBM) kag Pharmally.
Ini may kaangtanan sa kontrobersyal nga pagsaylo sang kapin P42 billion nga procurement deal sang mga medical supplies kag equipment sa kasagsagan sang COVID-19 pandemic.
Sa interview sang Bombo Radyo Bacolod kay Atty. Neri Colmenares, malain nga krimen ang pagpangawat sa kaban sang gobyerno, apang mas malain nga ini ang ginhimo kadungan sa pandemic kun sa diin kadam-an ang naga-antos.
Panindugan sini nga dapat may makasuhan gid sa anomalya, nga isa man sa pinakadako nga issue sa Duterte administration.
Pahayag sini, tuman ang kampanya ni former President Rodrigo Duterte angot sa kurapsyon, apang mga kasumpong sa politika lamang ang gina-atake sini kag madasig manghinaw kun mga kaalyado na niya ang involved.
Ginapakamaayo ni Colmenares nga sa pihak sang pagpamahog, nanindugan si former Senate Blue Ribbon Committee chair Richard Gordon nga makafile sang complaint sa Ombudsman apisar sa pagpamahog ni Duterte, nga nagresulta sa indi sini pagdaog sa eleksyon.
Apang aminado ini nga wala pa natapos ang away bangod sa Pilipinas, ang rekomendasyon ang sarang nga indi sundon kag ang makauhan ang sarang ma-acquite kag may-ara man sang naconvict na apang nagadaog pa sa eleksyon.
