Gin-athag sang Executive Vice President sa BAYAN MUNA Partylist nga ang indi lamang mahimo makapartisipar sa 2025 partylist election amo ang mga partylist nga wala nakadaog sa nakaligad nga duha ka sunod-sunod nga eleksyon.
Sa interview sang Bombo Radyo Bacolod kay Atty. Carlos Isagani Zarate, nakafile na sang “intention to participate” ang BAYAN MUNA sang nakaligad nga oktobre.
Apisar nga wala nakapwesto ang BAYAN MUNA sang nakaligad nga eleksyon, paathag ni Zarate nga sila ang kwalipikado pa nga makapapili sa maabot nga eleksyon bangod isa ka bes palang ang mga ini nga wala nakasulod.
Suno diri, “intention to participate” lamang ang ginapangayo sa mga existing partylist kag sa masami nagapatigayon sang convention isa ka bulan antes ang filing sang certificate of candidacy sa pagpili sang magaserbe nga kandidato.
Mas malawig naman ang proseso para sa mga panibag-o lamang nga mga partylist.
Sa pihak nga bahin, ang mga mapierde sa duha ka sunod-sunod nga beses ang magapabilin gihapon bilang partylist, apang indi makapapili sa eleksyon para sa pwesto sa House of Representatives.
Dugang pa sini nga consistent man ang performance sang BAYAN MUNA humalin sang sila ang nagpartisipar sang 2001 tubtob sang 2022.
Nagapati ang anay kongresista nga ginproyekto ang ila pagkalutos nakaligad nga eleksyon.
Suno kay Zarate, bangod ang BAYAN MUNA ang nagaserbe nga tingog sang marginalize sectors, kalakip na ang mga imol, mangunguma, mamumugon kag mga Indigenous People.
Aminado ini nga madamo sang mga Partylist sa karun ang nahijack na kag ginapanguyatan sang mga politiko, negosyante kag mga makagagahom nga pamilya, kag wala nagakahatagan sang husto nga pagtamod ang ginarepresentar nga sektor.
Suno kay Zarate, bangod sa ila paggahod sang nakaligad kun sa diin ila nga ginbatikos ang mga sobra-obra na nga buluhaton sang nakaligad nga administrasyon, gani sila ang nangin subject sa pag-atake, pagpangguba kag red tagging.
Pasalig sini nga sila ang padayun nga manindugan agud makalab-ot sa Kongreso ang singgitan sang mga marginalized sector.
