Gin-inspeksyon na kahapon ni Bacolod City Mayor Evelio “Bing” Leonardia ang Bays Center nga pagagamiton bilang respiratory out-patient center para sa mga pasyente nga may yara sang respiratory conditions kaangay sang ubo, sip-on, asthma ukon hilanat.
Sa interview sang Bombo Radyo Bacolod kay City Administrator Em Legaspi-Ang, ginpahayag sini nga ang nasambit nga consultation center ang magabulig sa pagligwa sang mga emergency rooms kag mga out-patient department sa ospital.
Suno kay Ang, magabutang man sang napulo ka mga doktor, mga nurse kag iban pa nga mga health care professionals sa lugar agud mag-atinder sa mga pasyente.
Gin-athag man sini nga ang Bays Center ang indi quarantine site kundi consultation center lamang para sa mga persona nga nagabatyag sang mga mild respiratory symptoms kadungan sang COVID-19.
Sa karon, 24/7 na nga nagatrabaho ang City Engineer’s Office agud nga magamit na ang lugar sa mas madali nga panahon.
Nahibaluan nga amat-amat na nga ginadala sa pilot center nga nahamtang sa South Hills Academy sa Barangay Alijis ang mga persons under monitoring (PUMs).Ginkumpirmar naman ni Ang nga indi na pag-gamiton ng West Negros Integrated School sa Barangay Mandalagan-Eroreco bilang quarantine site sang mga persons under investigation bangud madugay na ini nga wala nagamit kag madugayan pa antes ini makaayo.
Sa baylo, nagtanyag ang Queen of Mercy Hospital sang 17 nila ka mga isolation rooms agud magamit sang mga PUIs.
