Nagdangat sa kapin P5 million ang nakumpiskar nga iligal nga droga sang Bacolod City Police Office – City Drug Enforcement Unit (BCPO-CDEU) sang bulan sang Setyembre.
Suno kay CDEU Head P/LT Joven Mogato, kapin P5 million ang kabug-usan nga balor sang tanan nga nakumpiskar nga iligal nga droga sa tatlo ka operasyon nga ginpatigayon sang mga kapulisan kung sa diin ang pinakadako amo ang nakumpiskar sa Purok Riverside, Barangay Bata, siyudad sang Bacolod.
Nakuhaan sang masobra P4.9 million nga balor sang iligal nga droga ang mga suspetsado nga sanday Erwin Belonio alyas boy, 34 anyos kag Anthony Solon 38 anyos.
Ang duha ang ginakabig nga mga high value individual samtang may ara man sang nadakpan nga duha ka street level individual.
Ang droga nga nakumpiskar ang may kabug-aton nga 725 grams sa balor nga P4,927,000.
Panugyan ni Mogato nga magpalapit sa mga kapulisan sa paghatag sang impormasyon agud nga matapna ang pagluntad sang ilegal nga droga sa syudad sang Bacolod.
