BACOLOD CITY — May natipon na nga impormasyon ang kapulisan tuhoy sa ginapanaguan sang iban pa nga robbery groups nga nagapangbiktima sa ciudad sang Bacolod.
Ini ang ginapahayag ni Bacolod City Police Office (BCPO) Director Police Senior Supt. Jack Wanky, sa exclusive interview sang Bombo Radyo, tuhoy sa ginahimo sang kapulisan sa asud-asod nga kinawatay sa ciudad.
Suno kay Wanky, sang tinalikdan nga gab-i ginpalab-ot sa iya sang gintukod nga Theft and Robbery Task Force nga may natipon sila nga mga impormasyon sa ginakutaan sang mga robbery groups kag ila gina-monitor ang hulag sang mga ini.
Nagalum ang BCPO Director nga magpadayon ang ini nga development kag dalayon na nga madakpan ang masupog nga mga makawat agud mahagan-hagan ang mga insidente sang kinawatay.
Ginpabugal man ni Wanky nga sang nagligad nga mga inadlaw, nangin malaka ang kinawatay, indi kaangay sang tinalikdan nga sinemana nga masaku ang mga insidente.
