Nagbilin sang pahanumdom ang Bacolod City Police Office para sa selebrasyon sang Valentine’s Day bwas, Pebrero 14.
Sa interview sang Bombo Radyo Bacolod kay BCPO Spokesperson Police Captain Rosalino Pugoy, pahanumdom sini sa mga mag-asawa nga magabiya sa ila balay nga seguruhon nga ini ang sirado agud malikawan nga makawatan.
Sila ang magadeploy man sang kapulisan sa mga areas of convergence bwas, ukon mga lugar nga mahimo padulong sang madamo nga tawo sa pagsaulog sang adlaw sang paghigugma.
Panugyan sini sa mga pumuluyo nga tsekyaron sang temprano kun sa diin nakaplastar ang mga kapulisan agud nga mahapos makapangayo sang bulig kun kinahanglan.
Suno diri, dapat nga magpabilin nga alerto sa mga pagpanglakaton.
Pahanumdom man ni Pugoy sa mga menor de edad nga nagaluyag-luyag na, nga maghinay-hinay lamang agud wala sang hinulsulan sa ulihi.
Nagpaandam man ini batok sa Love Scams.
Suno diri, sa masami ang mga scammer ang nagapakilala nga foreigner kag ginakuha ang buot sang ila nga mga target tubtob ini ang makwartahan.
Gani pahanumdom sini nga dapat kilalahon gid sang maayo kun sin-o ang ka-chat.
Sa karun wala paman sila sang nabatun nga kaangay nga report, apang aminado si Pugoy nga sa kaangay nga mga binulan nagasaka ang kaangay nga kaso.
