Nagapanawagan ang tagpamaba sang Bacolod City Police Office (BCPO) sang kooperasyon sang mga pumuluyo matapos nga marekord ang ikapito nga shooting incident nga nagluntad sa syudad sang Bacolod.
Subong nga bulan sang Hunyo, nagdangat na sa pito ang shooting incidents nga nagluntad sa syudad nga ginalakipan sang sa Barangay Sum-ag kun sa diin napasakaan na sang kaso ang suspetsado, Barangay 35, sa dalan Luzuriaga, sa Barangay Alangilan, sa dalan Ramos, sang tinalikdan nga gab-i sa Barangay Sincang-Airport kag ang pinakaulihi ang nagluntad sa Purok Langis, Barangay Banago syudad sang Bacolod.
Sa interview sang Bombo Radyo Bacolod kay Police Lt. Col. Sherlock Gabana, dako nga pagtilaw sa mga kapulisan sa syudad sang Bacolod ang mga nagaluntad nga shooting incidents.
Suno kay Gabana, nagapadayon pa ang ila imbestigasyon kag masolbar ang kaso.
Ginahibalo man sang mga ini ang identity sang suspetsado sa pagtiro-patay sa biktima bangud suno sa mga pumuluyo pangayaw lamang ini.
Naga-ayo man ini sa mga pumuluyo sang ila kooperasyon bangud indi man tanan nga bahin sang syudad ang madeployan sang mga kapulisan ilabi na nga suludlon nga lugar.
Indi man matul-id kun may kaangtanan sa illegal nga druga ang pagpatay sa biktima bangud ang katapo sang Scene of the Crime Operation (SOCO) ang nakakita sa paghinakop sang biktima sang tooter kag lighter.
Nagapangabay ini nga kun may yara sang makita nga bag-uhan ukon suspetsyoso nga tawo sa lugar, gilayon nga magpahibalo sa mga kapulisan ukon barangay officials agud malikawan nga matabo ang mga insidente kaangay sang shooting incidents, pagpangawat kag iban pa nga krimen.
