Padayon ang imbestigasyon sa natabo nga fish kill sa Ilog-Hilabangan River sa Barangay 2, banwa sang Ilog, Negros Occidental.
Una nga nagluntad ang fish kill sa banwa sang Hunyo 19 kun sa diin ginkakibot sang mga residente nga makita ang nagalutaw nga patay nga mga isda kag ini ang liwat nga natabo sang Hulyo 1.
Sa interview sang Bombo Radyo kay Marianne Jill Sajo Abeto, pinuno sang Bureau of Fisheries and Aquatic Resources (BFAR)-Negros Occidental, nahimo na nga nagkuha sang water sample si Punong Barangay Nicanor Lopez sang barangay 2 apang naglapas na ini sa anum ka oras nga dapat nga mapasa gilayon sa laboratory.
Suno kay Abeto, liwat sila nga magapatigayon sang water sampling kag back tracking kaupod ang Department of Environment and Natural Resources (DENR) sa nagluntad nga fish kill.
Apang, sa karun nag-abiso ini sa mga residente nga indi dapat pag- iconsume ang mga nakuha nga isda nga patay na bangod nga wala nahibaluan ang rason sang kamatayon sini.
