BACOLOD CITY — Nagpaandam ang Bureau of Fisheries and Aquatic Resources ukon BFAR sa sin-o man nga magtandog sa dolphin kag balyena nga endangered species sa kagadatan.
Ini ang kasunod sang pagkapadpad sang isa ka species sang dolphin sa Purok Mahigugmaon, Barangay Pahanocoy, ciudad sang Bacolod kahapon sang hapon.
Suno kay Arlan Merambel sang BFAR Negros Occidental nga amo ang nagresponde sa lugar kahapon, ginbalik na sa tubig ang dolphin.
Makapila kuntani ka beses nga gindul-ong ini sang mga mangingisda sa madalom nga bahin sang baybayon apang nagabalik sa higad amo gani nga gindul-ong ini sa mas madalom pa gid nga parte sang tubig.
Gin-athag naman ni Merambel nga wala sang implikasyon ang stranding sang dolphin bisan pa nga nagatinir ang mga ini sa madalom nga bahin sang dagat.
Nagpanugyan naman ini sa mga mangingisda sa lugar nga indi pag-ihawon ukon kaunon ang dolphin bangud santo sa layi, may yara sang penalidad sa sin-o man nga magahimo sini sa endangered species.
Santo sa nakabutang sa kasuguan, ang maga-ihaw sang dolphin ang mahimo nga mamultahan sang 500 mil pesos tubtub lima ka milyon ka pesos kag pagkapriso nga napulo tubtub 12 ka tuig.
