Mabuot, wala sang kontra kag indi imbolbado sa illegal nga druga ang pamilya sang mekaniko nga ginluthang-patay sa Dalan Kamunsil, Barangay Villamonte, Bacolod City sang Hulyo 17.
Ang biktima ang ginkilala kay Jose Eduardo Boot, 37 anyos, temporaryo nga nagapuyo sa ginarentahan nga balay sa Barangay Villamonte apang tumandok sang Roxas Avenue, Barangay 39, syudad sang Bacolod.
Si Boot ang may apat ka igo sa dughan, apat sa likod kag lima sa buli.
Ang biktima ang kabahin na sang ikaduha nga pamilya sang iya amay samtang may yara man ini sang live in partner apang indi niya kaupod sa iya ginatiniran sa Villamonte.
Sa interview sang Bombo Radyo kay Jude Salusada, punong barangay sang Barangay 39, Bacolod City, mabuot ang pamilya ni Jose Eduardo kun sa diin abogado ang iya amay samtang Dean naman sa University of Negros Occidental – Recoletos ang iya nga lola.
Suno kay Salusada, wala sang gamo ang ila pamilya kag wala sila mayo nagagwa sa ila puluy-an gani nakibot na lamang ini sang nagtext si Police Major Ramel Sarona, station commander sang Bacolod Police Station 1 agud ikumpirmar nga residente sang ila barangay si Boot.
Suno sa iya, wala sang kaaway ang biktima kag hugot man ini nga nagapati nga indi ini imbolbado sa illegal nga druga.
