Ang paglamhit sang icing ukon cake sa guya sang mga abyan ang madugay na kag kilala nga tradisyon kun may yara sang naga-selebrar sang ila nga kaadlawan.
Madamo naman sang insidente kun sa diin nagresulta ini sa indi maayo apang may nahibaluan bala kamo nga insidente sa diin nangin motibo ini para sa pagpatay?
May yara isa ka lalaki sa India nga nagpangluthang bangud lamang sa cake nga ginpahid sa iya nga guya sa iya mismo nga kaadlawan.
Ang nagpaniro ang ginkilala nga si Jeetu Saini, 33-anyos, kag amo ang naga-selebrar sang iya birthday kaupod ang iya mga abyan sa isa ka gym.
Sang gin-serve na ang cake, pila sa iya mga abyan ang naglamhit sang cake sa iya guya bilang lahog, apang ini ang wala ginkalipay ni Jeetu.
Suno sa pila ka mga eyewitness, hinali lang nga nangakig ang 33-anyos kag sila ang nagbinaisay bangud sa cake.
Naggwa si Jeetu sa gym, kag sa iya pagbalik, may kaupod ini nga grupo sang kalalakinhan kag nagdala ini sang lisensyado nga armas.
Gin-alegar hinali na lang nga gintiro sang suspek ang tatlo ka mga lalaki nga yadtong iya ginbaisan.
Gilayon man ini nalagyo kaupod sang iya grupo matapos ang insidente.
Santo sa kapulisan, tatlo tanan ang may igo sang bala nga ginhingagaw pa sa ospital apang gindeklarar nga dead on arrival samtang, at large gihapon ang suspek kag ang iya sini nga grupo.
