BACOLOD CITY – Naparalisar ang 60 tubtob 70 porsyento sang biyahe sang depasahero nga mga salakyan sa isla sang Negros.
Ini ang base sa assessment ni Diego Malacad, ang secretary general sang United Negros Drivers and Operators Center (UNDOC), angot sa ginpatigayon nga untat-biyahe sini nga adlaw sang Lunes.
Sa pihak nga ila ginakasubo nga wala nila malab-ot ang target nga 100 porsyento nga paralisasyon sang biyahe, ginakabig nila sa gihapon nga madinalag-on ang ginhiwat nga transport strike bangud ila napatigayon ang aksyon-protesta nga nagapanawagan sa gobyerno sang mga kabudlayan nga ginapangatubang sang transport sector.
Samtang, gin-alegar ni Malacad nga luyag man kuntani nga mag-intra sa ila nga protesta ang mga myembro sang Sentrong Samahan ng Tsuper at Operators Negros (SSTONE) kag Federation of Bacolod City Drivers Association (FEBACDA).
Apang bangud sang pamahog sang Land Transportation Franchising and Regulatory Board (LTFRB) nga pagapinahan ang mga ini, nga gin-ugyunan man nanday SSTONE Secretary General Jessie Ortega kag FEBACDA President Elizabeth Katalbas, ginkulbaan ang mga ini kag nagpadayon na lang sa pagbiyahe.
