Nag-trending ang post sa social media sang isa ka volunteer group angot sa tatlo ka ido nga nakita nila sa sulod sang Chernobyl Exclusion Zone sa Ukraine, nga ginakabig nga most radioactive place sa kalibutan.
Ila ginkakibot nga ang balahibo sang mga ido nagaduag sang blue.
Nagpatigayon sang pagkapon sa mga ido ang volunteer group agud makontrolar ang populasyon sang mga ini sa nasambit nga delikado nga lugar.
Ginakabig nga most radioactive place sa bug-os nga kalibutan ang Chernobyl Exclusion Zone kag ini nangin restricted area matapos maglupok ang Chernobyl Nuclear Power plant sang 1986.
Kapin sa 120,000 nga mga residente ang gin-evacuate sadto kag madamo sa mga ido ang nabilin kag wala na nabalikan pa sang ila mga amo.
Ginapatihan nga madamo sa mga ido sa sulod ang mga descendants na sang mga hinuptan nga nabilin didto sang 1986.
Limitado lang ang makasulod sa lugar bangod kun sin-o man ang makasulod mahimo maka-angkon sang sakit kaangay sang cancer kag organ failure bangod sa high exposure sa radiation.
Indi man manami sa mga sapat ang radiation bangod sila mahimo magkasakit ukon ini mahimo halinan sang genetic mutations, physical deformities kag abnormal coloring.
Suno sa isa ka veterinary medical director, ang mga “blue dogs” indi resulta sang radiation apang sila posible nga naexpose lamang sa kemikal.
Healthy naman ang mga ido kag wala sang makit-an nga sintomas nga may yara sila sang sakit.
Target sila nga dakpon agud indi lamang para mahibaluan kun ano nga kemikal ang rason kun ngaa blue ang duag sang ila balahibo apang para makapon man sila.
