Nakabatun sang plaque kag certificate ang Bombo Radyo Bacolod sa tuigan nga Office of the Vice President Pasidungog.
Ang Pasidungog 2024 ang ginpatigayon sa Radisson Blu Hotel sa Cebu City.
Ang programa ang nagahatag sang pagkilala sa tatlo ka kategorya, nga ginalakipan sang award para sa partner sang OVP sa disaster response, para sa Intitutional Support, kag Special Project kun sa diin nalakip ang Bombo Radyo Bacolod, bangod sa mga programa nga nagabulig sa publiko kaangay sang Bombo Medico, Dugong Bombo kag iban pa.
Ang award ang personal nga ginbatun ni Bombo Mary Divine Grace Moreno Cuello, former Station Manager sa Bombo Radyo Bacolod, kag sa karun Station Manager sa Bombo Radyo Cebu.
Sa speech ni Vice President Sara Duterte, ang pagtililipon ang indi para dayawon ang kada isa kundi magaserbe nga pahanumdom nga may mga dalagkuan pa nga pagpanghangkat nga paga-atubangon para sa kaayuhan sang pungsod.
Ini ang magaserbe nga pahanumdom sa commitment kag responsibilidad bilang lider kag pumuluyo nga Pilipino, nga padayunon ang mga programa.
Pinaagi sini, ang Central Office, 10 ka Satellite Offices kag duha ka extension offices ang padayun man nga nagacater sang mga nagapangayo sang bulig.
Kaangay sa pagserbe sa nakaligad nga duha ka tuig, ginpasalig sang Bise Presidente nga ang OVP ang mangin epektibo pa nga ahensya nga tampad sa pagserbe sa pumuluyo kag sa pungsod.
Target sini nga ang ahensya ang makabulig sa pagbalik sang pagsalig sang mga tawo sa gobyerno pinaagi sa epektibo, mapinuslanon kag timely nga serbisyo publiko.
Apang ini ang mahimo lamang sa kolaborasyon, dedikasyon kag commitment sang tanan.
Samtang kabahin man sa mga nakabatun sang award sanday former Bacolod City Mayor Evelio ‘Bing’ Leonardia, Vice Mayor El Cid Familiaran, pila mga Barangay sa ciudad sang Bacolod, Himamaylan City Mayor Raymund Tongson kag iban pa.
