Ginaselebrar sang Bombo Radyo Philippines ang ika-54 nga kaadlawan subong nga adlaw.
Hulyo 6 tuig 1966 sang gintukod ang Bombo Radyo Iloilo, ang flagship station sang Bombo Radyo Philippines Network, kag gintawag pa lamang nga DYFM, isa ka estasyon sang radyo nga nakatuga sang daku nga influwensiya sa kabuhi sang mga pumuluyo nga may yara sang sinumpaan para sa kamatuoran , freedom of expression, public service kag wholesome entertainment paagi sa paghimakas, pag antos kag dedikasyon.
Una nga ginpahamtang ang studio kag administrative office sang DYFM sa fourth floor sang Florete Building, Mapa Street, Iloilo City , samtang ang transmitter tower yara sa Barangay Sambag, Jaro.
Kaangay sang isa ka liso, gintanom ang estasyon nga napun-an sang paglaum nga magsanyog kag magpamunga.
Ginsilakan sang kaalam sang mga pinuno kag ginbunyagan sang tubig sang dedikasyon sang mga katapo. Ini ang nagpanalinsing kag nagsanga.
Una nga nangin kabahin ang DYFM sa Northern Broadcasting Corporation NBC sang ginbaton ni Don Marcelino Florete Sr., ang grand old man sang Bombo Radyo, ang imbitasyon ni anay Ilocos Sur Governor Antonio Villanueva nga mag-upod sa isa ka joint venture.
Kag kaangay sang isa ka produktibo nga puno, ini ang nagpamunga.
Gikan sa diutay nga mga personnel, amat-amat nga nagsanyog ang network, sang makuha sang Florete Group ang NBC, ini ang may napulo ka mga provincial stations kag duha ka affiliates, sa Luzon, Visayas kag Mindanao, kag agud mangin matalunsay kag madinalag-on ang pagpadalagan sang estasyon nagsulod ang Florete Group sa management alliance kaupod sa Consolidated Broadcasting System Incorporated ukon CBS People’s Broadcasting Service kag News Broadcasting Network.
Dekada 70 sang ang ang flagship station nga DYFM ang ginhatagan sang bag-o nga pangalan kag nangin DYFM BOMBO RADYO, kag humalin sadto, mas nagtatak ang pangalan nga BOMBO RADYO tungod ini lamang ang nagaisahanon nga estasyon nga nagagamit sang drum ukon bombo.
Summer sang 1976 sang nagbulig si Dr. Rogelio Mirasol Florete sa pagpadalagan sang kumpaniya sa pagkumbinsir man sa iya sang iya iloy nga si Donya Salome Florete.
Sa amu man nga tuig, nakatukod si Dr. Florete sang kaugalingon nga FM station sa Iloilo, ini ang DYRF kag karun kilala na bilang 99.5 Star FM “Iba Ang Dating!” kag ang panibag-o sini karon nga tagline, “Like Mo, Share Mo!”
Humalin sadto amat-amat nga nagdamu ang estasyon sang network tubtob nakatukod sang FM stations sa Metro Manila paagi sa pagbakal sang DWSN sa Universal Broadcasting Network sang 1986.
Sa karon, gikan sa naga-isahanon sadto nga estasyon, nagdamo ini kag nagdangat sa 43 ka mga radio stations sa Luzon, Visayas kag Mindanao: 22 ka mga Bombo Radyo AM stations kag 21 ka mga Star FM stations, kalakip na diri ang DYWB Bombo Radyo kag 95.9 Star Fm sa siyudad sang Bacolod.
Sa inyo nga amon mga tagpalamati, madamo gid nga salamat sa pagsakdag kag pagsuporta sa amon nga proyekto kag mga programa.
Subong nga adlaw, ginadumdom ang ika 54 ka tuig nga anibersaryo sang Pambansang Radyo ng Pilipinas, kag No. 1 Radio Network in the Country, ang Bombo Radyo Philippines. . . BASTA RADYO. . . BOMBO!!!!
