Ginbuksan na ang Bourbon Street sa New Orleans, Louisiana, USA apisar sa nagluntad nga terroristic attack.
Sa interview sang Bombo Radyo Bacolod kay Noor Moraña, Bombo International News Correspondent derekta sa Houston, Texas, may patigayunon pa nga quarter finals sang Sugar Bowl, ukon American Football sa nasambitan nga lugar gani ginbuksan na ang dalan.
Ang Bourbon Street ang makabig nga iconic street sa New Orleans, nga masami gid kadtuan sang mga turista.
Madumduman nga nagdangat sa 16 ang mga napatay matapos gin-arado sang electric Ford pickup truck nga ginamaneho ni Shamsud-Din Jabbar, 42 anyos, US citizen gikan man sa Texas, kag ini ang nagbayluhanay pa sang luthang sa mga kapulisan antes mapatay.
Natumod nga si Jabbar ang army veteran, nagserbe man nga reservist kag makatatlo na nga nagdivorce sa asawa.
Duha ka tuig na sang nakaligad sang ini ang nangin radical kag nagsulod sa Muslim.
Antes mapatay nagpost pa sa social media si Jabbar nga na-inspire ini sa terrorist group nga ISIS kag luyag man sini nga mamatay.
Narecover sa salakyan ni Jabbar ang mga improvised explosive device sa salakyan kag sa kalapit nga area.
Nakita man sa bumper sang salakyan ang ISIS flag gani ini ang ginkabig nga “act of terrorism”.
Gina-imbestigaran pa sa karun kun naga-isahanon lamang ang suspect ukon may ka-kuntsaba.
Ginakatingala naman ni Moraña kun paano nakasulod ang salakyan sa area bangod sa pagkahibalo sini, wala ginapahanugutan nga makasulod ang salakyan sa lugar.
Nagalaom naman ini nga wala sang Pilipino nga napatay ukon nasamaran sa insidente.
