First time sa kasaysayan sang Palarong Pambansa nga gikan sa isa lamang ka Rehiyon ang naghampang sa championships matapos nga mag-atubangay sa finals sang Badminton Singles – Secondary Boys ang duha ka Cadiznon Athlete.
Sa interview sang Bombo Radyo Bacolod kay Badminton Coach Jordan Sun, nadaog ni Lovic Javier ang gold medal samtang si Cris Ivan Dosano naman ang nakakuha sang silver medal para sa Region 6.
Suno kay Sun, sa 25 ka tuig sini nga pagserbe nga coach karun lang ini nakabati nga may finals sa Palaro nga gikan sa isa lamang ka rehiyon kag isa lamang ka lugar ang magkasumpong.
Pahayag sini nga may 16 ka badminton players ang Western Visayas, 10 ang gikan sa Cadiz City, duha gikan sa Negros Occidental High School kag apat nga gikan sa Iloilo.
Sa masami, sila ang nagapauli gid man sang mga medalya sa kada Palaro, apang karun lamang na sensationalize bangod parehas nga Cadiznon ang nag-atubangay.
Gin-athag sini nga may duha ka category ang Badminton Singles – Secondary Boys, nga kinahanglan pahampangan kun sa diin si Lovic ang naghampang sa upper singles samtang si Cris Ivan naman sa lower singles.
Bangod nadaog nila ang tanan nga kasumpong sa ila nga division, sila nga duha ang nag-atubangay sa championships.
Si Lovic ang Grade 12 student sa Dr Vicente Gustilo Memorial National High School samtang si Cris Ivan ang Grade 11 naman sa North Negros College.
Pahayag ni Coach Sun nga ang kadalag-an ang team efforts, gikan sa preparasyon kag suporta sang Department of Education division of Cadiz City, Cadiz City Government kag Provincial Government sang Negros Occidental.
Dako man ang pasalamat sini sa suporta ni Cadiz City Mayor Salvador “Bading” Esalante nga nagahatag sang mga panginahanglanon sang mga atleta kalakip na ang mga sapatos; kasubong man si Negos Occidental Governor Eugenio Jose “Bong” Lacson nga naghatag sang personal nga bulig luwas pa sa suporta sang Provincial Government.
