Nagpanindugan ang pinuno sang Bacolod Traffic Authority Office (BTAO) nga tanan nga units sang private kag public transportation ang ginatsekyar agud makita kun may yara sang nagakaigo nga mga papeles.
Sa interview sang Bombo Radyo Bacolod kay Police Major Junji Liba, naglinong ang downtown area kag pila ka mga dalanon sa syudad sang Bacolod kasunod sang indi pagbiyahe sang mga traditional jeepneys nga indi kumpleto nga papeles agud makalikaw nga madakpan sang Land Transportation Office (LTO) kag Land Transportation Franchising and Regulatory Board (LTFRB).
Ini ang nagresulta man sa pagkastranded sang pila ka mga pasahero.
Ginpahayag man sini nga may yara sang pila ka mga nadakpan apang wala man sang resistance bangud aminado ang mga ini nga problemado ang ila nga mga papeles.
Suno pa diri, ginareklamo man sang pila sa mga drivers sa traditional jeepneys nga wala ginacheck sang BTAO, LTO kag LTFRB ang iban nga salakyan, apang nagpanindugan ang BTAO head nga tanan ang ginatsekyar bangud general application ang ginapatuman nga prinsipyo.
Suno kay Liba, may yara sang probational authority ang iban nga modernized jeepney apang ini ang temporary lamang samtang ginahulat ang prangkisa.
Sang 2019 pa ginpagwa ang memorandum sa modernization kun sa diin may yara sang malawig nga tion agud nga magcomply antes ang pa ang pagpatuman.
Nakahibalo man ini nga mabudlay ang transition kag mahal ang units sang modernized jeepney apang wala man sila sang mahimo bangud isa ini ka layi nga dapat ipatuman.
May yara pa sang pila ka mga traditional jeepneys nga nagabiyahe bangud active pa ang ila mga papeles.
Nagpanawagan man si Liba sa mga commuters sang gamay nga paghangop bangud sa transition period kag indi naman magdugay magabalik na sa normal ang tanan.
Nagpanugyan man ini sa mga driver sang tradisyunal nga jeep nga dapat pungkuan ini kag estoryahan kag mag-analisar sa pag-amat amat saylo sa modernized jeepney bangud sa luyag sang mga ini kag sa indi, dulaon na ang traditional jeepneys kag modernized jeepney nalang ang magabiyahe.
Ginpahayag man sini nga sa modernized jeepney may yara sang security of tenure, kumpleto sa benepisyo kag wala na sang dapat lagson pa nga boundary.
