BACOLOD CITY — Indi na maluyag pa si Mayor Evelio “Bing” Leonardia nga magtugda tuhoy sa desisyon sang Bacolod City Water District (BACIWA) Board of Directors angot sa reinstatement ni Atty. Juliana Carbon bilang general manager.
Suno sa alkalde, igarespeto sang city government sang Bacolod ang desisyon sang Board of Directors kag indi na siya magpasilabot pa diri bangud makabig ini nga internal matter sang water district.
Suno kay Leonardia, bisan sin-o pa man ang magpungko nga lider sang BACIWA, kuntani tutukan sini ang problema sa suplay sang tubig sa ciudad.
Nagalaum man ini nga magaresulta sa bastante nga suplay sang tubig ang bulk water supply project sang water district upod sa pribado nga contractor.
Ginpabutyag sini nga daku nga bagay ang tubig sa pag-uswag sang ciudad bangud makaganyat ini sang madamo nga mga negosyante.
May kaangtanan sini, nahisayran nga mahimo nga sa bulan sang Oktubre pa makasugod sa paghatag sang tubig sa Bacolod City Water District ang Bacolod Bulk Water, Incorporated.
Suno kay Engr. Samuel Pinado, assistant general manager for administration kag nagapungko karon nga officer in charge sang water district, nagpahayag sa iya ang bulk water supplier nga sini nga Agusto kuntani matapos na nila ang tanan nga kinahanglanon agud makapatubod sang bastante nga tubig sa BACIWA.
Apang indi ini matigayon bangud sang pila ka kabudlayan nga nasugata sang bulk water supplier kasubong na lamang sang pagkuha sang permits.
Apang suno kay Pinado, napagkit sa kontrata nga ginsudlan sang contractor kag sang BACIWA nga kinahanglan maka-deliver na ini sang water supply sa Oktubre 7, 2017.
Ginalauman nga magalab-ot sa 10,000 tubtob 15,000 cubic meters ukon tubtob 15 ka milyon ka litro sang tubig kada adlaw ang sarang ma-suplay sang injection point number one sa Barangay Granada.
Subong man, nagapadayon ang pagpatukod sang mga pasilidad sang contractor para sa injection point number 2 sa Barangay Mansilingan.
