Nakabaton sang duha ka prestihiyoso nga award ang Cadiz City Jail sa ginhiwat nga ika-11 nga Jail Service Recognition Day – Gawad Penolohiya 2026 sang Mayo 7 sa Bureau of Jail Management and Penology Negros Island Region sa Bacolod City.
Ginpasidunggan ang nasambit nga jail facility bilang Best Performing Jail Unit (Type B) samtang si Joseph Anthony T. Bayan naman ang ginkilala bilang “Best City Jail Warden.”
Ang Best Performing Jail Unit award ang nagakilala sa maayo nga performance sang pasilidad sa operasyon sang prisohan, implementasyon sang mga programa kag paghatag sang serbisyo para sa Persons Deprived of Liberty (PDLs). Nagapakita man ini sang ila compliance sa standards jail management kag rehabilitation programs.
Sa interview sang Bombo Radyo kay Jail Inspector Joseph Anthony T. Bayan, Acting City Jail Warden sang Cadiz City Jail,, ang ila nabaton nga pasidungog ang resulta sang nagkahiusa nga pagtinguha sang mga jail personnel, stakeholders, kag partner agencies nga padayon nga naga-suporta sa mga programa kag operasyon sang Cadiz City Jail.
Suno diri, lakip sa mga ginahatag nga programa para sa mga PDLs amo ang pag-train sa ila sa pag-ubra sang mga livelihood products kag may ginahatag man sila nga health services paagi sa mga jail nurses.
Ginkilala man sang BJMP ang suporta sang Cadiz City Local Government Unit sa pagpamuno ni Salvador G. Escalante Jr. sa pagpalig-on sang serbisyo kag rehabilitation programs para sa mga PDLs.
Pahayag sini, ang nasambit nga pagkilala magaserbe nga inspirasyon agud nga mapadayon ang dekalidad nga serbisyo kag mapauswag pa gid ang mga reporma kag rehabilitation efforts sa sulod sang jail facility.
