Nagapati ang city veterinarian sa ciudad sang Cadiz, Negros Occidental nga ang nagpatay sa 15 ka mga inugbulang nga manok sa Concepcion Subdivision, Barangay Caduhaan, ciudad sang Cadiz, kahapon sang aga amo ang layaw nga mga sapat.
Sa interview sang Bombo Radyo Bacolod kay Dr. Josue Rabang, mahimo nga may nakasulod nga layaw nga sapat kaangay sang singgarong ukon wild cat kag gin-atake ang mga hinigtan nga manok.
Suno kay Rabang, breeding season sa karun sang ido gani madamo na ang nagalayaw.
Ginpahayag man sini nga mahimo nga mismo ang ido sang tagbalay ang nag-atake man sa mga hinigtan nga manok.
Suno pa kay Rabang, sa teorya sini ang grupo sang nagalayaw nga ido ang nagtaklas sa pader kag nag-atake sa mga hinigtan nga mga manok.
Suno diri, mahimo ang ginkaon lamang sang mga layaw nga sapat ang parte lamang sang lawas sang manok ang ginkaon.
Wala man ini nagapati nga ginaalegar nga aswang ang may kahimuan sa pagpatay sang mga inugbulang nga manok.
Madumduman nga kahapon, ginsaysay sang bata sang tag-iya sang manok nga alas 4:00 sang kaagahon sang nakita nila ang 15 nila ka manok nga inugbulang nga may kabug-usan nga balor nga kapin sa P30,000 ang lunsay mga patay na.
Suno diri, wala ini nagapati sa aswang, apang alas 12:00 sang kaagahon may nakita ini nga babayi nga pula ang mata, itom, kag malaba ang buhok nga nagapungko sa kilid sang ila balay.
Gilayon naman sini nga gintawag ang iya amay kag kapin alas 4:00 sang kaagahon nasapwan na lamang nila ang mga manok nga, iban wala na sang kasudlan, iban wala sang ulo, may yara nga tiil na lamang nga nakahigot ang bilin kag may yara man nga balahibo na gid lamang ang makit-an kag dugang pa sini, kaangay nga ginpangkagat kag ginkaon ang mga sapat.
