Ginpamatbatan nga guilty sa reklamo nga Grave Abuse of Authority kag Gross Negligence of Duty ang alkalde sang banwa sang Calatrava nga si Mayor Marilyn Era.
Ang kaso ang ginfile sa Sangguniang Panlalawigan nanday Dr. Lewyn Torres kag Dr. Kristine Ureta, nga nagreklamo sang early termination bangud sang pagkakas sa ila sa serbisyo bilang consultant sang Calatrava Municipal Hospital sa pihak nga wala pa natapos ang ila kontrata.
Ginkuha ang consultancy services nanday Torres kag Ureta humalin Abril 1 tubtob Hunyo 30 apang Mayo pa lang, ginhambalan na sila ni Calatrava District Hospital Chief-of-Hospital Dr. Elien Lumanog nga indi na sila paghatagan sang schedule rotation para sa bulan sang Hunyo.
Nagsulat ang duha ka doctor kay Mayor Era apang wala nagsabat ang alkalde rason sang ila pagdangop sa Provincial Board.
Ginpatawag ang mga ini sang SP Committee on Laws, nga ginapanguluhan ni 2nd District Board Member Pal Guanzon, para sa isa ka preliminary conference sadtong Oktubre 29 apang wala nakatambong si Mayor Era.
Sa nasambit nga conference gindismiss ang reklamo batok kay Lumanog kag sa ila nga Hospital Administrator nga si Jeric Ryan Belargo bangud sang lack of jurisdiction.
Sa final decision sang Sangguniang Panlalawigan, ginpamatbatan nga guilty si Mayor Era kag gindagdagan sang duha ka bulan nga suspension.
Apang, agud indi maapektuhan ang pagdul-ong sang serbisyo sa mga pumuluyo sang Calatrava, nadesisyunan nga sa baylo nga suspension, ang duha ka bulan nga sweldo sang alkalde nga ihatag na lamang kanday Dr. Torres kag Dr. Ureta.
