Magapatuman sang experimental nga Car Free Sunday sa dalan Lacson sa maabot nga Hunyo 9.
Sa pahayag ni Bacolod City Mayor Alfredo “Albee” Benitez, siraduhan ang South Capitol Road padulong sa Bangga Ramos halin alas-5:00 tubtob alas-9:00 sa aga.
Bangod Environment Month ang bulan sang Hunyo, ini ang pamaagi sang ciudad agud maibanan ang pinakadako nga contributor sa climate change kag greenhouse effect, ang pollution gikan sa tabutso sang mga salakyan.
Ang proposal ang naaprubahan sa ila nga Bacolod Traffic Authority Council (BTAC) meeting, kun sa diin sa pagsirado sang 1.2 km nga dalan ini ang mangin bukas naman para sa mga pedestrians ukon luyag magwalking, jogging kasubong man sa mga bikers.
Sila ang magadihon pa sang resolusyon agud ini ang ma-implementar kada Domingo, apang sila ang magasugilanon anay sa mga business establishments sa area.
Paathag naman sang alkalde nga ang Car Free Sunday ang tuig 2000s palang ginapatigayon na sa mga European Country’s kag na-implementar naman sa pila ka mga local government units sa Pilipinas kaangay sa Makati City, Iloilo kag Cebu.
Ginpahayag naman sang chairperson sang Committee on Transportation sa Sangguniang Panlungsod sang Bacolod nga wala pa sini nakita ang proposal sa pagpatuman sang Car Free Sunday.
Sa interview sang Bombo Radyo Bacolod kay Councilor Al Victor Espino, tinutuyo nga siraduhan ang bahin sang dalan Lacson kag South Capitol Road para hatagan sang kahigayunan ang mga luyag magjogging, walking, zumba kag magbike.
Ini ang maga-umpisa sa Hunyo 9, alas- 5:00 sang aga tubtob alas- 9:00 sang aga.
Suno kay Espino dapat nga mag-agi sa SP ang proposal bangod nga may patigayunon nga rerouting sa area kag mahatagan sang konsederasyon ang mga nakapalibot nga mga establishemento agud wala sang problema.
