Dako nga bulig sa pagsolbar sang kaso kaangay sang natabo kay Pearl Joy Galve ang pagtanyag sang padya sa sin-o man nga makahatag sang husto nga impormasyon nga makabulig sa pagsolbar sang kaso.
Sa interview sang Bombo Radyo Bacolod kay Police Col. Joeresty Coronica, City Director sang Bacolod City Police Office, ginpakamaayo sini nga mahatagan man sang cash reward ang sin-o man ang makahatag sang impormasyon nga makabulig sa pagsolbar sang kaso ni Pearl Joy Galve.
Madumduman nga namissing si Pearl Joy sang Hulyo 29, kag nasapwan nga nagaka-agnas na nga bangkay sang Agosto 14 sa sulod sang kampo sa Hda. San Roque, Barangay Cubay, La Carlota City.
Sa mahibaluan, P20,000 tubtob sa P50,000 ang maximum nga mabaton sang makahatag sang impormasyon depende sa kabug-aton sang krimen.
Suno sa BCPO Director bisan nga sa La Carlota City, Negros Occidental nasapwan ang biktima, apang ini ang residente sa Barangay Sum-ag, Bacolod City gani covered sang cash reward ang makahatag sang impormasyon nga makasolbar sang kaso.
Nagapadayon ang imbestigasyon sang mga kapulisan sa nasambit nga kaso kag sa karun wala pa sang mabakod nga ebidensya nga makatudlo sa persons of interest nga nakahimo sang krimen.
Nagabuligay sa karun ang La Carlota City Police Station kag Bacolod City Police Station 9 sa imbestigasyon agud nga masolbar ang kaso.
