Ginahulat pa sang Bacolod City Administrator ang sabat sang caterer nga gina-alegar nga nagserbe sang pan-os nga pagkaon sa mga empleyado sang Bacolod City Government Center.
Sa interview sang Bombo Radyo Bacolod kay Atty Mark Steven Mayo, nakameeting na sila kaupod ang tanan kag ang Bacolod City Government Employees Union (BCGEU) kag gin-estoryahan ang insidente nga nagluntad sang tinalikdan.
Suno kay Mayo, madamo sila sang nabaton nga reklamo angot sa ginserbe nga pagkaon nga gina-alegar pan-os.
Suno diri sa tion sang meeting ginkumpirmar man sang BCGEU ang angot sa mga reklamo kag gin-explain man ang chain of custody.
Ang pagkaon ang gindeliver alas 3:00 ang takna sang hapon santo sa nakasaad sa kontrata.
Suno sa BCGEU pag-abot sang pagkaon ila na nga ginpanagtag gilayon bangud nagahulat naman ang mga empleyado kag napahibalo naman ang mga empleyado nga alas 3:00 sang hapon mahimo na makakuha sang pagkaon kag nakabutang man sa claim stub.
Suno kay Mayo ang caterers ang magahatag sang ila eksplinasyon sa BCGEU kag iforward man ang ini sa opisina sang Bacolod City Administrator.
Wala man sang naospital ukon nasakitan sang tiyan bangud santo sa impormasyon nga natipon sang pagbukas sang foodpacks nga may lain na nga baho wala na ginkaon.
Samtang may iban man nga nakakaon nga waay man sang reklamo.
May pila man nga wala na nagkuha sang pagkaon sang nabatian nga pan-os na ini.
Sa inisyal nga report 70 to 80 percent sang empleyado ang nagreklamo nga pan-os ang pagkaon.
Ang budget sa nasambit nga event ang P3.2 million kag ang P1.3 million ang nagkadto sa pagkaon.
Ang pondo ang ginrelease paagi sa cash advance.
