Nakuha sa CCTV footage ang pag-abot kag paghalin ni anay Department of Public Works and Highways (DPWH) Undersecretary Catalina Cabral sa hotel kun sa diin siya nagtinir sang Disyembre 18 antes ang pagkahulog sini sa pil-as sang Tuba, Benguet.
Suno sa report, ang nasambit nga footage ang yara na karon sa kamot sang mga imbestigador matapos makabaton sang subpoena ang hotel halin sa Philippine National Police (PNP) kag National Bureau of Investigation (NBI).
Sa isa ka video clip, makita si Cabral nga nagalakat pakadto sa driveway sang hotel sang hapon sang Disyembre 18.
Ang SUV sini nga ginamaneho sang iya driver, ang nakita man nga nag-abot sa hotel makaligad sang pila ka minutos.
Pasado ala-1:00 sang hapon, gin-updan sang driver ang anay opisyal pakadto sa iya suite nga yara sa ika-apat nga panalgan sang hotel.
Makita man sa CCTV footage ang pagsulod sang driver sa iya kwarto sa hotel sa amo nga oras.
Apang pasado alas 2:00 sang hapon, nakita si Cabral nga nagapanuktok sa kwarto sang iya driver kag hinali nga nagsulod, kag sila ang magkaupod nga nag-gwa sa kwarto.
Pila ka minutos ang naglabay, isa pa gid ka video clip ang nagpakita sa duha nga nagsakay sa SUV antes ang alas-3:00 sang hapon.
Nagapati ang mga otoridad nga padulong sila sadto sa Kennon Road sa amo nga tion.
Wala na nakuhaan sang footage ang pagbalik sang driver alas-5:00 sang hapon kag sang iya liwat nga paggwa alas-6:00 sang gab-i.
