BACOLOD CITY – Daku nga pagpanghangkat ang pamunuan ang Community Environment and Natural Resources Office (CENRO) sa ciudad sang Kabankalan.
Sa interview sang Bombo Radyo, paagi sa Good Morning, Philippines program, ginpahayag ni CENRO Rosievel Dimatulac, ang CENRO-Kabankalan ang may jurisdiction sa 59 porciento sang kabug-usan nga forestland area ukon kagulangan sang bug-os nga probinsiya sang Negros Occidental.
Ini ang nagasakop sang napulo ka mga banwa sa Sur nga bahin sang probinsiya halin sa banwa sang Hinigaran tubtob sa banwa sang Ilog.
Suno kay Dimatulac, ang pagpanghangkat yara sa pagbantay sang kabukiran bangud wala sang management body nga makabulig sa ila pagpatuman sang environmental laws diri.
Sa sini, nagasalig na lamang si Dimatulac sa bulig sang mga kabanwahanan kag kaciudaran nga nasakupan sang CENRO-Kabankalan.
Ginahingyo man sini ang bulig sang transport groups kag Land Transportation Office (LTO) agud matapna ang ilegal nga pagkuha sang mga produkto gikan sa kagulangan nga nasakupan sini.
Suno kay CENRO Dimatulac, tuman kalapad sang ila area of jurisdiction rason nga mabudlay para sa ila nga bantayan ini.
Apang isa sa mga stratehiya nga ila gin-adoptar amo ang pagpadala sang sulat sa mga transport groups lakip naman sa LTO nga nagapaalinton nga ang mga produkto gikan sa kabukiran nga wala sang nagakaigo nga dokumento ang lunsay ilegal.
Sa sini, iya ginapanugyanan ang mga drivers nga indi pag-ikarga ang ilegal nga mga produkto bangud sarang sila nga dakpon kag lakip naman sa ma-impound ang ila ginabiyahe nga salakyan.
