BACOLOD CITY — Asod-asod ang nangin kadalag-an sang Ceres Negros Football Club sa homecourt sini matapos nga ila naman gin lutos ang Stallion FC sa nagapadayon nga Philippine Football League 2017 nga gin hiwat sa Panaad Park and Stadium kahapon.
Ginkamasaan sang Negros-based football Club ang Stallion FC sa score nga 5-1 matapos ang match-up las 4:00 kahapon.
Duha ka goal ang napasulod sang Español nga si Bienvenido Marañon samtang nakatigayon naman sang hat trick ukon tatlo ka goals si Fernando Rodriguez.
Samtang napasulod ni Jess Melliza ang naga-isahanon nga goal sang Stallion FC.
Liwat nga maga-atubangay ang nasambit nga mga team sa Panaad Park and Stadium, las 4:00 sa gihapon sa Sabado.
Nahibalu-an nga nag-desisyon ang Stallion FC nga diri nalang hampangon sa Bacolod ang ila homegame nga kuntani patigayunon sa Biñan Football Stadium sa Laguna.
Madumduman nga gin lutos man sang Ceres Negros ang Kaya FC Makati tinalikdan nga Sabado kasunod sang hat trick ni Bienvenido Marañon.
