BACOLOD CITY — Nalutos sa homecourt sini kag napaslawan nga makasulod sa 2017 AFC Cup Inter-Zonal Finals ang Ceres Negros Football Club batok sa pangayaw nga Istiklol FC sang pungsod Tajikistan sa ila nga sambuwa nga natapos sa 1-1.
Ang hampang sa Panaad Park and Stadium kagab-i ang ikaduha na nga hugnat sang semi-finals kun sa diin nalutos man ang Negros-based football team sa una nila nga pag-atubangay sa Hisor Central Stadium sa Hisor, Tajikistan sa score na 4-0.
Sa tunga sang paghugyaw sang 4,682 nga tumalan-aw, nangin mainit na ang hampang sa first half pa lamang apang mas nagbaskog pa gid ang cheer sang audience sang mapasulod ni player number 4 Manuel Herrera ang una nga goal sang Ceres Negros FC sa ika-33 nga minutos.
Mas naghugot na gid ang pagbantay sang Istiklol tubtob nga makabalos man ang ila player 10 nga si Dmitrii Barkov agud mapatas ang score sa four minutes additional time.
Sa pihak sang ila pagdaog, may pila ka mga reklamo si Istiklol FC Head Coach Mukhamadiev Mukhsin, partikular na sa mga violations nga gintawag sa ila mga players.
Paagi sa interpreter, ginpahayag ni Mukhsin nga kaangay nga ginligwat na ang pagsulundan sa hampang nga football bangud makapila gintawag sang referee ang atensyon sang ila players.
Nahibaluan nga isa ka Istiklol players ang ginpapanugan sang red flag samtang duha naman ang may yellow flag.
Nahibaluan nga naghatag sang dugang nga kabudlayan sa dumuluong nga team ang madanlog nga field bangud sang mabaskog nga pag-inulan kahapon kag ang malawig nga biyahe padulong sa playing venue.
