Ginpaathag sang chairman of the board sang Bacolod City Water District (Baciwa) ang mga basehan sa pagterminate sa 60 ka mga empleyado sang water district epektibo Disyembre 31, 2020.
Kaina sang aga, wala na ginpasulod ang 60 ka mga empleyado nga nakabaton sang order nga ginpagwa ni Baciwa acting general manager Engr. Michael Soliva sadtong Disyembre 29, 2020 kasunod sang Board Resolution No. 172 nga nagadeklarar sang ila posisyon nga “Redundant” rason sang “separation of service” ukon pagkakakas sa trabaho.
Sa interview sang Bombo Radyo Bacolod kay Lorendo Dilag, chairman of the board sang Baciwa, ginpahayag sini nga santo sa opinyon sang Office of the Government Corporate Counsel (OGCC), sarang nga makakas sa trabaho ang mga empleyado sang water district sa idalom sang section 11 sang Republic Act 6656.
Suno kay Dilag, may yara sang tatlo ka mga rason agud mapahalin sa pwesto ang empleyado sang Baciwa.
Ini kun ang posisyon ang gin-abolish ukon gin-render bilang redundant, ikaduha amo nga kun ang posisyon ang gin-merge, gin-divide ukon-ginconsolidate agud mahimo ang kinahanglanon sang gobyerno kag ikatatlo amo ang mga rason nga ginatugutan sang Civil Service law.
Suno kay Dilag, nagsulod sa number 1 ang rason kun ngaa sarang materminate ang 60 ka mga empleyado sang Baciwa.
Paathag sini, sang nagpaidalom sa joint venture agreement ang water district kag Prime Water, 26 nalang kabilog ang mabilin nga empleyado sa Baciwa nagikan masobra 500.
Ginhatagan sang duha ka option ang mga empleyado.
Ini amo nga mag-apply sila para sa employment sang Prime Water ukon magbaton sang Early Retirement Incentive Plan.
Suno kay Dilag, madamo ang nag-avail sang early retirement kag madamo man ang nagpa-absorb sa Prime Water apang ang 60 ka mga empleyado ang nagdesisyon nga magtiner sa Baciwa apisar pa nga wala na sang posisyon para sa ila.
Ginpasiguro naman ni Dilag nga handa ang Baciwa board nga atubangon ang kaso nga ipasaka sang union sang mga empleyado.
