Nagapati ang chairperson sa Committee on Transportation sa Sangguniang Panlungsod nga bastante ang mga public utility vehicle nga makabyahe sa ciudad sang Bacolod apang ginakulang lamang bangod sa may mga ginabalabagan.
Sa interview sang Bombo Radyo Bacolod kay Councilor Al Victor Espino, aminado ini nga deretso sang mga transport group kaangay sang Bacolod Alliance for Commuters Operators and Drivers Inc. (BACOD) ang pagprotesta, apang indi maayo nga ipaagi sa bayolente nga lihok.
Panindugan sini nga bukas ang Sangguniang Panlungsod sa panawagan sang mga ini kag sila ang buligan man nga mapalab-ot ang ila concerns sa nagakadapat nga ahensya sang gobyerno.
Isa na diri ang Kabakod Negros Transport Coalition Incorporated (KNETCO) nga nagdangop sa ila, rasun nga si Vice Mayor El Cid Familiaran ang ginhatagan sang gahom nga makarepresentar kag idul-ong ang ila position paper sa Kamara kag Senado.
Naluoy naman ini sa mga drivers nga nahaylo nga mag-upod sa bayolente nga pagpamatok sa gobyerno.
Sa pihak sang pagkastranded sang madamo nga pasahero sa Barangay Handumanan, panindugan ni Espino nga bastante ang numero sang modernized jeep kag consolidated traditional jeepneys nga makabyahe sa routa.
Apang madamo sang mga traditional jeepneys nga sarang kuntani nga makabyahe ang ginabalabagan kag ginapahog sang mga unconsolidated traditional jeepney drivers kag operators.
Bangod sa mga kinagamo nga nagluntad, si Bacolod City Mayor Alfredo “Albee” Benitez ang nagpanaog na sang derektiba kay Bacolod City Police Office (BCPO) director Police Col. Noel Aliño nga ipatuman kun ano ang yara sa layi.
