BACOLOD CITY — Ginapasiguro sang tourism officer sang Sipalay nga indi magpareho sa isla sang Boracay nga nagapangatubang karun sang problema sa sewerage system ang ila mga isla sa ciudad.
Ini ang pahayag ni Rhia Carbajosa kasunod sang problema sa isa sa pinakasikat nga isla sa bug-os nga kalibutan nga ginpaandaman ni Presidente Rodrigo Duterte nga ipasira kun indi masolusyunan ang problema sa sewerage system.
Suno kay Carbajosa, may yara karun sang 25 ka accommodation establishments sa Sipalay nga ginalakipan sang mga resorts, inns kag convention houses kag ini ang ginadugukan sang mga European tourists.
Suno pa kay Carbajosa indi kaangay sa Boracay nga ginadugukan sang Asian tourists mga European ang nagadugok sa Sipalay bangud nga luyag sang mga ini ang malinong kag kalmado nga sitwasyon.
Ang mga Europeans naman suno sa tourim officer mga “big spender’ kag environment friendly.
Tagsa ka bulan suno kay Carbajosa, nagapatigayon ang joint inspection team sang Sipalay nga ginalakipan sang Engineering, Tourism kag City Health Office sang inspection sa mga accommodation establishments ilabi na sa ila mga septic tanks kag bangud sang kontrobersiya karun sa Boracay mas mangin istrikto ang ciudad sang Sipalay.
