Nagpanawagan ang medical center chief sang Corazon Locsin Montelibano Memorial Regional Hospital (CLMMRH) sa mga local government units nga kuntani icapacitate ang ila mga ospital kag kun masarangan man lang atipanon ang mga pasyente, indi na lang pag-irefer sa regional hospital.
Ini ang kasunod sang pagdamo sang mga pasyente nga nagapila sa gwa sang CLMMRH sugod sang malift ang community quarantine sa probinsya kag ciudad.
Sa interview sang Bombo Radyo kay Dr. Julius Drilon, nagpanawagan ini sa mga LGUs nga irefer lang sa regional hospital ang pasyente kun indi gid masarangan ang pagbulong sa mga pasyente bangud ila prayoridad ang mga nagakinahanglan gid sang pagbulong kaangay sang may mga cancer, nagapa-chemotherapy, may mga appointment kag ang mga nadischarge na nga nagakinahanglan sang follow-up.
Nag-abiso man ini sa mga pumuluyo nga siguraduhon nga sila gid ang mapacheck-up bangud may yara sang mga persona nga nagapila kag nagakuha sang numero agud ibaligya sa mga matuod-tuod nga mapabulong.
Suno kay Drilon, indi ini pwede gani wala na sila dali-dali nga nagahatag sang numero magluwas lang kun may yara sang appointment slip.
Suno sa iya, dako gid ang bulig sang respiratory center nga nahamtang sa BAYS Center bangud didto nalang nagapatsekyar ang mga nagasuprer sang ubo, hilanat kag trangkaso.
Gani kun nagabatyag sang nasambit nga mga sintomas, imbis nga magdiretso sang CLMMRH, nag-abiso ang pinuno nga sa respiratory center na lang magpadulong.
