BACOLOD CITY-Ginpasiguro sang Corazon Locsin Montelibano Memorial Regional Hospital chief of hospital nga handa sila sa pagbulong sa mga persons under investigation (PUIs) angot sa 2019 novel coronavirus acute respiratory disease (NCOV-ARD).
Madumduman nga kahapon ginkumpirmar ni Governor Eugenio Jose “Bong” Lacson nga gina-obserbahan na karon sa CLMMRH ang isa ka 48-ayos nga lalaki nga isa ka Canadian national nga may travel history sa Taiwan kag isa ka 12-anyos nga Negrense nga lalaki nga nakakadto sang damlag lang sa Hong Kong kag Macau.
Sa interview sang Bombo Radyo Bacolod kay Dr. Julius Drilon, ginpahayag sini nga yara karon sa isolation area nga nahamtang sa Emerging and Infectious Disease Facility sang ospital ang duha ka mga PUIs.
Suno kay Drilon, mga trained personnel ang nagadumala sa mga ini.
Nahibaluan nga may yara sang walo ka mga nurse nga naga-duty kada shift sa isolation area.
Dugang pa ni Drilon nga may yara lamang sang tatlo ka mga isolation rooms sa regional hospital apang pananglitan nga magdamo pa ang numero sang PUIs sa probinsiya, mahimo man nga ma-convert ang 30 ka mga private rooms bilang isolation rooms.
Natalana man nga mag-abot sa Biyernes ang mga inflatable tents nga pwede magamit inkaso madugangan ang numero sang mga PUIs.
Liwat naman nga nagpahanumdom si Drilon sa publiko nga indi mag-panic bangud wala nagabuot-silingon nga kun nakasimhot ang isa ka tawo sang virus, mapatay na ini dayon.
Suno diri, pabakuron lamang ang immune system kag magsunod sa mga precautionary measures agud nga indi matapikan sang n-CoV.
