BACOLOD CITY — Indi pa kinahanglan nga magpatigayon ang probinsya sang Negros Occidental sang cloudseeding operation bisan tuman kainit ang lakat sang panahon sa karun.
Ini ang ginpahayag ni Atty. Japhet Masculino, officer-in-charge sang Office of the Provincial Agriculturist.
Suno kay Masculino, wala pa sa karun ginakonsiderar sang probinsya ang pagpatigayon sang cloudseeding samtang gin-assess naman sang Department of Agriculture kag sang provincial agriculture’s office kun kinahanglanon gid ang amo nga operasyon.
Nagalibot sanday Masculino sa bilog nga probinsya samtang ginatipon man ang report sang tanan nga municipal kag city agriculture’s office sang mga banwa kag component cities bilang kabahin sang ila assessment.
May yara na sang pending request ang probinsya sa Department of Agriculture para sa posible nga cloudseeding operation samtang nakahanda man ang amo nga ahensya nga maghatag sang counterpart nga pondo.
Suno kay Masculino, may mga sahi sang tanom nga indi dapat nga maulanan kaangay sang sandiya kag mangga nga nagapamunga sa karun amo gani nga isa ini sa konsiderasyon antes ang cloudseeding.
May iban man nga mga lugar sa probinsya suno kay Masculino nga wala nagaproblema sa supply sang tubig bangud malab-ot sang irrigation system.
