Tuman ang kalipay sang coach sang Bayawan City wrestling boys nga nakakuha sang apat ka gold ang ila nga team sa nagapadayon nga Negros Island Regional Athletic Association Meet (NIRAAM) 2026.
Sa interview sang Bombo Radyo Bacolod kay Coach Alfie Herrera, tuman ang kalipay sini nga nakakuha sila sang apat ka gold sa wrestling boys kag apat man sa wrestling girls.
Suno kay Herrera may 16 sila tanan ka players nga ginalakipan sang walo ka mga lalaki nga players kag walo man sa babayi.
Nakasumpong sang mga ini ang mga atleta gikan sa Negros Oriental kag Negros Occidental.
Ginpahayag man sini nga pressured sila bangud defending champion sila sang Region 7 sa sulod na sang tatlo ka tuig kag dapat depensahan sang mga ini ang ila standing sa Negros Island Region.
Nalipay man ini sa performance sang ila nga mga players apisar nga may kabudlayan ang mga ini sa pagpangita sang mga estudyante nga magahampang sa wrestling.
Isa man sa mga sakripisyo nga ginhimo sang mga estudyante amo ang ila pagtuon agud nga maka-training.
Gani tuman ang pagpasalamat sini sa ila performance sa NIRAA Meet 2026.
Sa bahin naman sang mga players lunsay nga proud ang mga ini sang ila performance kag ang ila nga kadalag-an ang ila ginahalad sa ila coaches, trainers, pamilya kag supporters.
Tuman ang ila pagpasalamat sa Ginoo nga gin-ubayan ang mga ini kag ginhatagan sang kusog para sa ila nga hampang.
