Liwat nga naga-panawagan ang Commission on Elections -Bacolod City sa tanan nga mga lokal nga kandidato nga ibutang sa insakto nga lugar ang ila mga posters.
Suno kay Atty. Ann Jannette Lamban, OIC head sang Comelec Bacolod, padayon sila nga naga-ugtas sa mga kandidato ilabi na sa duha ka mga aspirant councilors nga sanday Rico Villafuerte kag Jason Villarosa nga masami makit-an ang ila posters sa kahoy kag poste.
Kinahanglan pa nga mag-usar sang ladder truck suno kay Lamban kun mag-baklas sang poster ni Villafuerte bangud ini ang yara gid sa pinaka-babaw nga bahin sang poste.
Ini ang kabahin sang Oplan Baklas sang Comelec agud pang-baklason ang mga posters sang mga pasaway nga naga-padalagan para sa May 2019 midterm elections nga wala naga-sunod sa kasuguan sang ahensya.
Naga-panawagan si Lamban sa tanan nga mga kandidato ilabi na kay Villarosa kag Villafuerte nga ibutang gid sa desiganted area ang mga posters.
Nag-pahanumdum man ini sa tanan nga mga botante sa syudad sang Bacolod nga kilalahon sang husto ang ila mga kandidato nga luyag nila ibutang sa pwesto agud indi sila mag-hinulsol sa sulod sang 3 ka tuig kun mag-palpak ang iga-hatag sa ila nga serbisyo.
