Nagpatigayon man sang motu proprio investigation ang Commission on Human Rights-Negros Occidental sa pagpatay kay Pearl Joy Galve.
Madumduman nga ang 15 anyos nga Grade 10 student ang namissing sang Hulyo 29 sa Barangay Sum-Ag, Bacolod City kag nasapwan ang nagakaagnas nga bangkay sa sulod sang kampo sa Hacienda San Roque, Brgy. Cubay, La Carlota City, Negros Occidenta sang Agosto 13.
Sa interview sang Bombo Radyo Bacolod kay Vincent Parra, pinuno sang CHR – Negros Occidental, naumpisahan na nila ang pagpatigayon sang motu proprio investigation bangud ang biktima ang menor de edad kag babayi.
Suno kay Parra ang kaso ang ginahandle na sang babayi nga investigator bangud tuman ka sensitibo ang kaso.
Suno diri, ginamonitor nila ang dalagan sang kaso agud nga mahibaluan kun ano na ang naubra sang gobyerno agud nga masolbar sang kaso.
Ginpahayag man sini nga dapat ang vulnerable sector ang ginahalungan kag ginalantaw man kun sa natabo may paglapas sa tawhanon nga kinamatarong sang biktima kasubong man sa suspek.
Nagalaom man ini nga mahatagan sang hustisya ang natabo sa biktima.
