Naka-file na sang motion for reconsideration ang pamilya ni Nicus Balagosa matapos nga gin-dismiss sang prosecutor’s office ang kaso nga ginpasaka batok sa lima ka mga susptesado nga nagpatay kay Nicus sa sulod mismo sang ila nga balay.
Madumduman nga sang Hunyo 2, ginsulod sang mga suspek si Nicus sa ila nga balay sa Granada Heights, Barangay Granada, Bacolod City, kag ginluthang sa atubang mismo sang iya ginikanan.
Isa sa gina-alegar nga suspek diri amo si Carlito “Dondon” Tongho, amay sang 16 anyos nga babayi nga gina-alegar ginlugos sang duha ka abyan ni Nicus.
Sa interview sang Bombo Radyo sa amay ni Nicus nga si Eric Balagosa, sang Agosto 5, gin-dismiss ang kaso nga ila ginpasaka batok sa mga suspetsado kag Agosto 9 sang sila ang nagfile sang motion for reconsideration.
Suno diri, sadto wala pa nila nahatagan sang madalom nga pagtamod ang pagpasaka sang kaso bangod nga nagabatyag pa sila sang kasubo sa pagkadula sang ila bata, apang sa karun may yara sila sang dugang nga testament kaangay na lamang nga mismo nakita nila ang nawong sang isa sa mga suspetsado matapos nga nadagdag ang mask sini bangod nga may komosyon pa nga nagluntad antes ginluthang si Nicus, kag may yara man sila sang dugang nga testigo nga nakawitness sang pagkastigo sa mga abyan ni Nicus kag sa pagsulod sang mga suspek sa balay sang biktima.
Samtang, dako naman ang pagpasalamat sang pamilya ni Nicus Balagosa sa pagbulig ni Bacolod City Mayor Alfredo ‘Albee’ Benitez agud nga mahatagan sang hustisya ang natabo nga pagpatay sa ila nga bata.
Suno sa alkalde, naghatag na ini sang derektiba kay City Legal Officer Atty. Romeo Carlos Ting Jr. nga usisaon kag tun-an ang kaso sa pagpatay kay Nicus kun ano ang mahatag nga legal assistance sang ciudad.
Suno pa diri, luyag sini mabatian kun ano ang rason kun ngaa na-dismiss ang kaso.
