Nagsulat ang Confederation of Sugar Producers Associations, Inc. (Confed) sa Department of Agriculture kag naghingyo nga kun sarang sila nga mahatagan sang subsidy ukon financial assistance nagikan sa gobyerno bangud sa nagasaka nga presyo sang abono.
Sa interview sang Bombo Radyo kay Confed spokesperson Raymond Montinola, ginpahayag sini nga nakahibalo man sila nga nagasaka ang presyo ang abono ilabi na sa urea sa world market kag may problema sa supply.
Gani nagapangayo ini sa bulig sa gobyerno nga mahatagan ang mga mangunguma sang financial assistance nga pwede sila makahulam ukon maskin ano nga pamaagi nga makabulig sa mga ini.
Suno kay Montinola, kun magkulang ang fertilization sa kampo, maigo man ang production kag kun maigo ang produksyon, maapektuhan man ang food security.
Suno sa iya, tuman ka importante ang food security sa karun nga may ginapangatubang nga pandemic.
Lunes nga adlaw sang mga ini ginpadala ang sulat kag sa karun nagahulat pa sila sang response.
