Nagasaludar ang Diocese of Bacolod kay Congresswoman Juliet Marie Ferrer sang Cuarto Distrito sang Negros Occidental bangud sa pagboto sini batok sa pagbuhi sang silot nga kamatayon.
Nahibaluan nga si Ferrer ang nagaisahanon sa pito ka mga mamalidha sa probinsiya nga nagboto batok sa House Bill 4727 antes naaprubahan sa second reading ang hagna.
Suno kay Fr. Felix Pasquin, rector sang San Sebastian Cathedral, nagadayaw ang simbahan sa maayo nga konsensya nga nag-giya kay Ferrer nga nagasantu sa talaksan sang Mahal nga Dios sa kun ano ang husto kag matarong.
Samtang, ginakasubo naman sang simbahan ang pagpabor sang anom ka iban pa nga kongresista sa Negros Occidental sa silot nga kamatayon, ilabi pa nga ginakabig ang mga ini nga anak sang simbahan.
Nagapati si Pasquin nga nadala sang mabaskog nga huyop sang hangin sang pamolitika ang mga ini, ilabi na sang super majority.
